Gallery

Barzanî: Helwesta opozîsyona sûrî beramber mafên gelê kurd ne zelal e

Nûçexane – Serokê Herêma Kurdistanê Mesûd Barzanî opozîsyona sûrî rexne kir û got ku ew ne xwedî nerîneke eşkere ne ji bo pirsa kurdî li Sûriyê. Barzanî herweha got ku Kurdên li Sûriyê doza desthilatê nakin, lê dixwazin mafên wan misoger bin.

Di hevpeyvînekê de bi rojnameya erebî “el-Hayat” re Barzanî diyar kir ku Kurdên li Sûriyê ji mafên welatîbûnê bêpaar in. Wî got: “Ên din ji bo bidestxistina desthilatê serî hildidin, Kurd ji bo bidestxistina mafê welatîbûnê; ec cûdabûneke mezin e.” Barzanî herweha eşkere kir ku Herêma Kurdistanê hewil daye ku hikûmeta Sûriyê qanii bike ku siyaseta xwe ya tunekirina mafên Kurdan hewildanên mezin pêk anîne. “Lê pir mixabin tiştek nehat guhertin. Opozîsyona sûrî niha bi navê şoreşgeran diaxive, lê ti projeya zelal a vê opozîsyonê beramber mafên gelê kurd li Sûriyê tune. Ji ber vê yekê helwesta kurdî dimîne li ser vê projeya li aliyê opozîsyonê.”

Serokê Herêma Kurdistanê bi taybetî Encûmena Niştimanî ya Sûrî rexne kir û got ku ew jî ne xwedî nerîn an projeyeke zelal e ji bo pirsa kurdî li Sûriyê. Barzanî li ser mezintirîn hêza opozîsyonê ya sûrî got: “Pejirandineke fedyokî heye, lê ew ji bo mafên Kurdan ne rast û zelal e. Lê tevî vê Kurd di xwenîşandan û çalakiyên protestoyê de beşdar in û doza rûxandina rêjîmê dikin.”

Barzanî eşkere kir ku “em li şûna Kurdên Sûriyê biryarê nastînin, em alîkariya wan dikin, ew bi xwe biryarê didin bê bi kê re hevkariyê bikin. Ez vekirî bi birêz Xelyûn re axivîm û piştî hevdîtina pê re ez giham wê baweriyê ku li cem wan ti nerîneke li ser awayî danûstandina bi pirsa kurdî re tune. Kurd tevlî opozîsyonê nabin ger misogeriya guhertineke bingehîn a rewşa wan li Sûriyê nebin û ew bên pejirandin”.

Ji bo tevlêkirina Kurdan di nav rêzên Encûmena Niştimanî ya Sûrî serokê wê Dr. Burhan Xeliyûn berî çend hefteyan serdana Hewlêrê kiribû û ligel Barzanî rûniştibû.

Mesûd Barzanî ji piştguhkirina Kurdan di konferensa “Dostên Gelê Sûriyê” de aciz bû û got: “Li wê derê bi awayekî fedyokî behsa Kurdan hat kirin; ku wan behsa nekiriba, hîn çêtir dibû.” Kurdî: Rûdaw

Advertisements